قصيدة الصديق الكفو

الصديق الكفو



طبع الصديق الكفو يعـذر صديقـه
ولا شاف زلّة صاحبه يرتفع فـوق


وان عادها يبحث عن أسلم طريقـة
ويخبره باللي صار بإحساس وبذوق


والثالثـة الله يسـمّـح طريـقـه
ما احدٍ بمجبورٍ على خـوّة البـوق


فبعض العرب صحبته همٍ وضيقـه
لا فعلٍ يجمّـل ولا زيـن منطـوق


لما اعتزيت بخوّتـه نشـف ريقـه
وابشر بضحكة ناب وبهرج منموق


يحلف لك انك مثل خـوه وشقيقـه
وقلبه بنار الحقد والغـل محـروق


أدري المعانـي كلبوهـا عتيـقـة
وشعر الصداقة فيه ألفين طـاروق


لكن مشاعـر والمشاعـر رقيقـة
ولا اخفيتها ردّت لي الطاق مطبوق


وزادت على قلبي جـروحٍ عميقـة
ولما دفنت الجرح يطلع له عـروق


وأعمى البصيرة ما يشوف الحقيقـة
لا صار قلبه عن سنا الحق مصفوق


تلقاه يسأل عـن عصـاه وبريقـه
وهي في يده والقلب جا للبصر عوق


يطرد سرابٍ يخدعـه فـي بريقـه
ويقعد يغني ( كل مطرود ملحـوق )


وبعد التروّي قلت با اكتـب وثيقـة
تضبط علاقاتي مـع كـل مخلـوق


وما عاد أصاحب بالطبع والسليقـة
أصبح عليّ حقوق وأصبح لي حقوق


باختار لـي كفـو يمينـه طليقـة
وقلبه لسرّي ولخفايـاي صنـدوق


نفسه لهامـات المعالـي عشيقـة
ولا شاف مني زلّـة يرتفـع فـوق


صحّ البشر من آدم أبـو الخليقـة
لكن لكل إنسـان ميـزات وفـروق


وصلاة ربـي كـل وقـت ودقيقـة
على النبي وعداد ما لاحت بـروق

باختار لـي كفـو يمينـه طليقـة
وقلبه لسرّي ولخفايـاي صنـدوق


نفسه لهامـات المعالـي عشيقـة
ولا شاف مني زلّـة يرتفـع فـوق

صح السانك يابو مسلم ولاهنت ,, بصراحة القصيدة في قمة الروعه وفاقت اعجابي
لاعدمناك

لاهنت اخوي قصيده رائعه

يعطييك العافيه

باختار لـي كفـو يمينـه طليقـة
وقلبه لسرّي ولخفايـاي صنـدوق

أبيات رائعة وجميلة

شكراً أبو مسلم على إبداعك المتجدد

شكر الله لكم تواجدكم ومشاركاتكم

وفقكم الله وبارك جهودكم