الله يرحم ذيك الأيام

الســـلآم عليكم ورحمة الله وبركآته
علوم الطيبين ؟؟؟
إن شاء الله بخير

والله أنا اليوم جلست أتذكر أيام زمان
وسألت الوالده وسولفت لي عن زمان
ما أقول الا : يازينها والله من أيام
سقى الله القلوب النظيفه وأيام الطيبين
اليوم رآحوا ..

وبتذكرها معاكم واللي عنده شي من زمان يحطه لنا
والله إني أحب هالسوالف
يوم كآنت الوحده ع طول تصحى من النوم
تروح عند غنماتها ( تحسك وتنبذ وتحلب وتروع )
وما تطلع الا والدنيا قريبه من الظهر
وعقبها تدخل وتجهز فطور لـ زوجها وعيالها
ويفطرون وبعدها تقوم تفر البيت فر
تكنس وترتب وتغسل وتنظف
وبعدها تجلس مع زوجها وعيالها ويسولفون وينبسطون
أما اليـــــــــــوم !!!
لنا الله على ما نقوم ليلنا نهار ونهارنا ليل
نسهر حتى يأذن الفجر وننام حتى يأذن المغرب
وما نعرف الزاد ولا القعده مع أهالينا
الولد يصكها طلعه مع أخوياه
والبنت ع الجوال أو دافنه حالها مع شي بغرفه
ومعزوله عن العالم لو يشيلون البيت مادرت < ههههههههه جد
ولما تتزوج ترفض الغنم وما تطلع بينه و والله ماتشتغل عنده
ومن هالكلام الا وفوق هذا تبغى لها خدامه
وش عد تسوي الخدامه ؟؟
كذا يصرفون لها ع الفآضي !!
لا غنم ولا شغل بيت كلها كم غرفه تكنسهم بكناسة الكهرب
والأكل من المطعم .. < يعني ريحوا الخدم ( عوينهم )
وبصرآحه هذا الجيل كذآ متعودين
يعني زمان خلاص ولى وراح
بس والله في باقي ناس متمسكين بماضيهم > علاهم سماي الله ع قولتنا
والله ماشاء الله أيام رؤؤووؤؤووؤؤووؤؤووؤؤووعه
وما أقول إني مو من جيل اليوم
لا هو كلاً يطلع على شي وتغير جديد
يعني أنا من خلقت ما طلعت بين الغنم
يعني مو متعوده بس والله تعجبني أيام زمان
ويمكن لو كنت من عهدهم بأحب هالشي وبأتأقلم معهم
لإن جيلنا اليوم يختلف عن زمآن
بس والله أنا قد سبق وروعت غنم والله فللللللللللله
بس مره وما تكررت
يازين زمان كانوا مع بعض ع طول وعيشتهم بسيطه
ومتواضعه وراضين ولله الحمد أما الحين
كلاً بحاله هذا اللي بمدينه وهذا اللي مايدرون وينه
طلع مع أخوياه ولا رجع وياليل ما أطولك
بس اليوم كل شي تغير الناس تغيروا الوقت تغير
راح الطيب وراح الزين > (الله يرحم هذيك الأيام)
اللي عنده شي يعلمنا والله مافي أروع من هالسوالف
وفـ النهايه .. أشكركم ع المتابعه

الخ‘ـــــــــــــــــــــــيآله .

كان الناس اول بسطاء جدا
بينهم محبة والفة
ويوجد مشغلات للحياة
فنجدهم مستمتعين بحاتهم
التواصل بينهم اكثر
من الان فالبيت غير لا يوجد به اكثر من غرفتين في غالب الاحوال
ومكان الجلسة فيه يجتمع فيها الكل ومهما كان التعب هناك متسع في الصدور فنجد الاسرة مجتمعة والجوه سعيدة
واذا اتى الضيف ترى الفرح يعلو وجوههم وكانه يوم العيد
الحياة هي الحياة فيها فسحة وفيها امل
وفها جمال
ولكن تغيرت وسائل العصر
وتغيرت وسائل الاتصال بدل ان تكون نعم اصبحت نقم
واصبح الناس منعزلين منطوين علي انفسهم
قل طهر القلوب الذي كان واصبح الناس مظنة المفسدة بالرغم مما يحملونه من مبادئ لا تزال موجودة

اشكرك اختي الخيالة كم هو جميل طرحك
دمتي كما تحبين

الخياله
طرح جميل جدا
وذكريات اياماً طويت جميله
اشكرك من لاعماق

موضوع جميل

للرفع