انا بدوي في عيشتي ما تنعمت ..

أنا بدوي في عيشتي ماتنعمت

الصمت حكمه في مواقف تبي صمت...
والصمت في بعض المواقف مذله"

وانا بعد ياصاحبي يوم ساهمت...
مااقول شي الا يكون بمحلـه

امشي على وضح النقا ما توهمت...
والتايه اللي ما لقى من يدله

البادي اظلم وانت بادي وهاجمت
ودك تغير مسلك الناس كله

انا بدوي في عيشتي ما تنعمت
رمز الرجـوله سيف،،، والكيف دله

اعيش في صحرى الضما ما تألمت...
واقنص سباع البر في كل تلـه

محبوبتي صحراي في حبهــا همت...
اعشـق سهلها والرجوم المطله

ومن عيشتي فيها كفايه تعلمت...
ان الخضوع لغير ربي مذله

وان شانت الديره على النوق حملت...
وانزل بروض من اول امزان عله

تلقى الخزاما والنفل فيه لاحمت...
والقحويان يفيض حسنه ودلـه

حنا البدو ياللي علينا تهجمت...
حنا هل التاريخ والمجد كلـه

حنا البدو، حنا عرب مابنا شمت...
اصل ونسب محنا فروع وقلـه

نضل اعظــم منــك مهما تعاظمت...
انت الذنب،،، والراس حنا هلنلـه

وان كان لك يمنى طويله بها اقدمت...

يمناك واليسرى ترانا نشلـه

وللعلم خـدها كانك ما تعلمت...
اللغز حنا لك بغينـا نحلـه

سيف لنـا انت بحقه تكلمت...
في مامضى جدك ركع تحت ظلـه