يمه كبرت

يمّه كبرت وجملتك مرّت البال :

يابنيّتي هذا العمر لا يفوتك !


كوني الفرح كوني المحبة ولو طال :

حزنك عشاني إذبحيه فْـ بيوتك !


يمّه الوطن دمّر طموحي والآمال

ضمّيني أكثر رمّميني بصوتك !


محتاجتك لو صاروا عْيالي ارْجال :

عندك أنا طفلة ذراها فِـ كوتك !


الله ياهي دمعتك تنبت أجيال

منْها أتعلّم صبرك اللي بسكوتك !


ياحنيّنة حظي لو إنه معي مال :

برضاك عنّي ، دعوتك في قنوتك !


آطاول الأحلام وتخفّ الأهوال :

إنتي دفاي وقوّتي من ثبوتك !


الله يطوّل عمرك ويجبر الحال :

مااخاف الا لا تخيّلت موتك !
،،