قصيدتك

الشعر لـه فاتـل وناقـض وفـاروق والسـوق لـه سايـم وشـاري وبايـع

واللي ربح ببضاعتـه يمـدح السـوق والنـاس تطلـب نـادرات البضـايـع

يامدور الطيـب تخيـر علـى الـذوق واحفظ معك من قـول فـارس ودايـع

لو كان بالارشـاد والنصـح مسبـوق ذكـرى لعـل لهـا تـرق السمـايـع

جواهر معها شـذى المسـك مرفـوق ومعهـا التجـارب مثبتـه بالوقـايـع

واللي لبس من جوهر المرجلـه طـوق مثلـي مجـرب والتـجـارب نفـايـع

سافرت لي طرقة وطبيـت لـي سـوق وخاويت فـي دربـي جميـع النزايـع

والله خلـق فالنـاس ميـزات وفـروق النـاس شتـى بالشـيـم والطبـايـع

احـد علـى مبـدا ولـه نظـره فـوق واحد كمـا ثلـج علـى القـاع مايـع

ولاني وكيـل ادم علـى كـل مخلـو ق لكـن اشـوف بخلـق ربـي نـوايـع

اشفق على الطيب ولـي رفقتـه شـوق غريـب والا مـن قريـب الجمـايـع

وراع الردى من دونه البـاب مغلـوق بينـي وبيـن اهـل السفالـه قطـايـع

الطيب واهل الطيب عاشـق ومعشـوق والطيـب لـه مبـدا وحكـم وشرايـع

والمرجله وهبـه مـن الـرب ووفـوق والديـن راس المرجـلـه والطمـايـع

والرزق من ربي وله فـرض وحقـوق ومن يطلب ارزاقه من الخلـق ضايـع

والاخـذ بالاسبـاب ثابـت وموثـوق وتوفيـق ربـي هـو خيـار الذرايـع

ولاكـل مطـرود كمـا قيـل ملحـوق قـول مبالـغ فيـه لـو كـان شايـع

ان ماجلبهـا والـي العـرش برفـوق كثـر المطـارد مايحـوش النفـايـع

ومن يحسن النيه مع النـاس مـرزوق ومـن يتقـي ربـه دروبـه سنـايـع

والكذب ثـوب مـا يجمـل ومشقـوق ولاينرفـي شقـه بكـثـر الرقـايـع

ومن لايحـط اسـرار قلبـه بصنـدوق ويجـود المفتـاح عـن كـل صايـع

يفتح علـى نفسـه مداخـل وخـازوق وقناصـه الفرصـه تزيـد الجـلايـع

ومن يقرب الانـذال لا يامـن البـوق النـذل خايـن مـا يصـون الودايـع

عقرب ثـرى والا كمـا نـاب زاروق لا صـادف الغـرات للـسـم زايــع

واحـذر تـرى النمـام للشـر ناتـوق دايـم يـقـرب للـشـرار الـولايـع

من المكارم خـارب القصـد مسلـوق وعقلـه لنزغـات الشياطيـن طـايـع

وترى الردي شمع على الحيط ملـزوق لا اونس حميم الشمـس جـاك متمايـع

احذف ردي المعرفـه حـذف خملـوق لاتنـخـدع بالزبـرقـه واللـمـايـع

عليك بالطيـب ليـا صـرت مزنـوق الـلـي فعـولـه كلبـوهـا روايــع

يشيل عنك مـن الصعيبـات طـاروق ولا يلحـق المنـه جميـل الصنـايـع

لامن عن الواجـب هبـا كـل مزلـوق يقـوم بالـواجـب بعـيـد الرمـايـع

والشارب اللي ساعه الضيـق محلـوق وقت الرخاء ما احد يبـي لـه فزايـع

خله ولو شفته علـى الوجـه مصفـوق ولاتستشـيـر مجالسـيـن الربـايـع

وان كان في صدرك قنا الوقت مزروق خلـك علـى الشـده قـوي البتـايـع

واضرب على الكايـد لايلحقـك عـوق واطلع سنـود وخيـر ربـك طلايـع

والشمس لو غابت يجي صبح وشـروق والحق له صيـت مـع النـاس ذايـع

يقدم عزيز الساس لـو كـان مفهـوق وياخـذ عظيمـات المراجـل قـلايـع

وأبليس اخـو مـره مربـط ومفلـوق وفي كـل يـوم يـزود حـر ولقايـع

نركي علـى كبـده مراقيـع وحـروق وعـروق قلبـه مـن وحمنـا مزايـع

وصلوا على الهادي عدد ما أرمش الموق وعسى لنـا مـن جـود ربـي شفايـع