قصيده رثاء في الملك عبدالله رحمة الله عليه

يالله ياعالم بسرّ الضماير
واحوالها واسرارها الخافياتي
يامطّلع بالغيب سرّ وجهاير
وعندك مصير ايّامنا المقبلاتي
اجعل لنا في يوم تبلىٰ السراير
سترٍ لذنب ايّامنا الخالياتي
وهوِّن على قلبٍ من الهم فاير
زودٍ على طعناته الغامضاتي
اللي لها في داخل الصدر جاير
نارٍ تواقد بالحشا مسعراتي
من جورها باتت عيوني سهاير
اصبح وانا مازار عيني سباتي
ماغير اعالج مظلمات العباير
عبره بعبره وارجي الصبح ياتي
غرير في دنيا البلا والنكاير
ماكنت اظن انها تجي مسرعاتي
قفَّت وقلنا للسعد والسفاير
اثر الليالي بالحِملْ مثقلاتي
لا والله الا جت تجر الجراير
جتنا تجرّ الضُّلَّع الموحشاتي
حكم الولي فينا منفّذ وصاير
والحمد لله والبقا والثباتي
عليك يابو متعب الشعب ثاير
ثورة غلا وقلوبهم مرجفاتي
مرحوم يانجمٍ هوىٰ بالحفاير
ياما على نوره تقدّوا السُراتي
يامَنْكِب الجوزا تهاويت غاير
وقلوب شعبك جلجلت هاوياتي
يقول ابو يعقوب والقلب حاير
عجزت اعبّر عن شعوري وذاتي
ونّات قلبٍ تعتصره المراير
تناهبَتْ فكري وروّح شتاتي
تواردت مثل الظِميّ الحشاير
تسمع رَزَمْها حول عِدٍّ طُواتي
عسى السحاب اللي مزونه غزاير
يمطر على قبرٍ به الجود باتي
وعاد العوض سلمان بالعز ساير
ابو فهد ضلعٍ صليب القناتي
ضلعٍ نشأ بين الطويلات ناير
له في سما العليا مقيل ومباتي
يأمن به اللي صاب حظه عثاير
لو هي تحوف الضُمَّر الضارياتي
ظله يظلل من سموم الهجاير
وحجاه يذري من هوا العاصفاتي
بالدين يعرف والشيم والبصاير
ابو فهد عند الصعيبات عاتي
وولي عهده مقرن الليث زاير
قايد سلاح الجو والطايراتي
يابو فهد شعبك يحب الستاير
وان ثارت الهيجا ليوثٍ دهاتي
لاطار ستر منقّضات الظفاير
نارد مواريد العديم الزناتي
لابد من يومٍ تدور الدواير
على بني صهيون هم والطغاتي
الله ينصرنا على كل باير
ويحمي بلدنا من جميع الجهاتي
واقبل سلام الوادعي والعشاير
واسلَم وسلِّم ياكريم الصفاتي


(شفلوت سعيد آل خرصان الوادعي)