حوار خاص مع هامور مخدرات

لـقــاء مــع هــامــور مــخــدرات فـي نــجــران


لـقــاء مــع هــامــور مــخــدرات فـي نــجــران

( منقوووووول للامانه بس والله فيه قصص عجيبه أتمنى الكل بعد قرائه هذا الحوار ينتبه لأولاده وأخوانه ويوعيهم )

هذا اللقاء مع أحد المروجين الكبار لنتعرف على هذا العالم و ندخل في دهاليزه الخفيه واسراره و نعرف حقيقة الوضع والاسباب التي أدت به للأنزلاق في هذا الطريق و كيف يتم تجنيد صغار الموزعين لنخرج بالأسباب و العلاج . معآ في هذا اللقاء : -


بدايه نتعرف عليك قبل أن تدخل هذا الطريق و بعد أن دخلته ؟

في البدايه كنت موظف و كنت مرتاح في وظيفتي و غير محتاج لأي شئ و كنت أتعاطى الخمر في نهاية الاسبوع و الاجازات حتى تم القبض علي وانا سكران في أحد نقاط التفتيش و حكم علي بحد الجلد و ترتب عليه فصلي من عملي و خسارتي لمصدر رزقي .


كيف كان و ضعك بعد خسارتك للوظيفه ؟

حقيقه كان الوضع سئ جدا الناس صاروا يتحاشوني و صرت مثل الموبوء ماحد وقف معي وقال غلطه و تعدل كنت محتاج أي و قفه لكن للأسف الجميع تخلى عني على مستوى الاسره القبيله المجتمع وطبعآ كنت بدون مؤهلات علميه او راس مال عشان ابدأ من جديد و صرت في حاله يرثى لها من الانطوائيه و العزله لدرجت ما القى قيمة بكت دخان و تسكرت كل الطرق في وجهي .
بعدها رحت لواحد يروج حبوب و شرحت له ظروفي قام أعطاني مائة حبه تحت التصريف حسبها علي بألف و خمسمائه وروجتها ورجعت له بعد ايام و خذت منه دفعه جديده وشوي شوي تعرفت على الشخص اللي يمونه و تعاملت معه .


يعني اللي أعطاك في البدايه تركته و تعاملت مع الراس الكبير ؟

خلاص هذاك الاول كان موزع لكن هذا هامور صرت أخذ منه في البدايه أخذ من باغه الى باغتين طبعآ الباغه عباره عن الف حبه خمسه شدود وكان التعامل كاش الباغه بسبعه الاف ريال و كنت أصفي منها اربعه الاف ريال و مع التعامل و الثقه صار الهامور يعطيني عشرين باغه على راس كل أسبوع نتحاسب و استلم كميه جديده و هكذا .


فيه غيرك يتعامل مع الهامور؟

ايه كنا حوالي اربعين الى خمسين شخص و كل واحد له تعامل حسب الكميه اللي يصرفها لأن كل ما سحبت كميه أكثر يقل السعر عليك


عطني فكره عن الهامور هذا ؟

هذا الشخص واجهه لمجموعة أشخاص و هو اللي يتعامل مع مروجين المنطقه والاشخاص اللي هو واجهتهم يوفرون له حمايه و الحبوب توصله الى عنده عن طريقهم طبعآ توفير الحمايه اذا كان عليه مراقبه أعطوه خبر اذا كان فيه أي شئ ينبهونه وصعب اللي مثله يطيح في يد الحكومه لأنه صاحب جمله و تعامله مع مجموعه محدده وموزعه في المنطقه .


طيب الكميات اللي أنت تاخذها كيف تصرفها في اسبوع برغم كثرها ؟

اوزعها على موزعين صغار يشتغلون لحسابي


فيه موزعين لك ؟ و كيف يشتغلون لحسابك ؟

ايه طبعآ و لا كيف اقدر أصرف بضاعتي راح اشرح لك كيف صاروا يشتغلون لحسابي .
في البدايه يجيني واحد يشتري حبوب حق راسه ألقى فلوسه ناقصه و لا يترجاني ياخذها دين أنا استغل الفرصه وابدأ أقوله يأخي أنتبه لنفسك و سوي مثل الرجاجيل انا اعطيك كميه روجها و طلع حق راسك بدون ما تذل نفسك لحد وكذا صار يشتغل لحسابي و اعطيه كميه يوميه وأقوله اذا فيه حد تعرفه جبه لي ويكون عندي موزعين في كل انحاء نجران في الليل أصير أمر عليهم اتحاسب معهم و اعطيهم كمية اليوم الثاني زي ما تمر على مجموعة محلات لك يوميآ تجمع ايرادها .


طيب اذا احد مسكته الحكومه من الموزعين اللي يشتغلون عندك ايش الوضع ؟

والله اذا مسكته الحكومه يتحمل المسؤليه لحاله اولآ ماراح يعترف علي عشان اذا خرج من السجن يلقى من يساعده يبدأ من جديد لأنه لو اعترف اشتهر بينا كمروجين ولا حد راح يقبل يتعامل معه بعد كذا فهو يشل القضيه كامله و طبعآ كرت واحترق بالنسبه لي واذا خرج من السجن ارسله الى شخص أخر يشغله معه نوع من الأمن .


طيب ما فكرت تجيب انت و توزع في المنطقه يعني تصير هامور ؟

ومن اللي قالك ماني بهامور انا كنت اسرد لك كيف بديت بس ما كملت اسمع .
صار في الاجازات يجون الموظفين اللي خارج نجران و يشترون مني حق روسهم واسأل الواحد و ين أنت تشتغل و كنت اركز على موظفين في ثلاث مناطق الرياض ، وادي الدواسر ، الخميس
واسأله منين يشتريها في منطقته وأطلب منه يعرفني بالمروج اللي يتعامل معه و يتم التعارف و بعدها اسافر للمروج اللي في الرياض او الوادي او الخميس و نتفق أنه يموني بالجمله و الاسعار اقل طبعآ من نجران و يتم توصيل الحبوب عن طريقه الى نجران وانا اتحمل أجار توصيلها طبعآ الاشخاص اللي يوصلونها ما اعرفهم أقابلهم و أحاسبهم واخذ بضاعتي و مع السلامه .


وانت توزع في المنطقه جمله ؟

طبعآ جمله و قطاعي .


كيف توفر حمايه لنفسك من الدوله ؟

شوف في كل مكان خائن فيه اشخاص في ادارة المخدرات يتعاطون و نسعى لمعرفتهم و نبدأ نعطيهم حق روسهم مجان مقابل يكونون لنا عيون في الاداره اذا فيه أي شي يعطوني خبر أقوم أوقف شغلي اطلع خارج نجران في اجازه لين تهدأ الأمور و نرجع نشتغل و نغيير طريقة ترويجنا حسب الاوظاع .


طيب ما تشتغل في الحشيش ؟

هذا سيد الكيف طبعآ نشتغل فيه و هذا له قصه معي .
في البدايه طلعت الى اليمن عشان أشوف لي موردين هناك أتعامل معاهم و كان لي اصدقاء يمنيين رحت اليمن بالتحديد الى عدن و تعرفت على مورد هناك وأول كميه خذتها كانت ثلاثمائة كيلو و حطيت فيها شخص رهينه عشان مبلغها كبير شوي كان سعر الكيلو من ثلاثه الى اربعه الاف ريال سعودي حسب نوعية الزقاره و نقلتها من عدن الى صعده طبعآ نقلها في سياره حكوميه تابعه للأمن السياسي اليمني وكنت ناوي أنزلها السعوديه بس جاني سعر زين في صعده و بعت الكميه كلها جلست في اليمن سنتين انقل من عدن و الى صعده و شغل غير طبيعي بعدها رجعت السعوديه طبعآ في غيابي كنت حاط لي مساعد في نجران يقوم بشغلي عشان أحافظ على الموزعين حقي و عملائي و الموردين .
و لما رجعت عرضت على اللي يمونوني بالحبوب أني ارسل لهم حشيش وتم الاتفاق صرت اجيبها من اليمن عن طريق مهربين مع الجبال الى نجران يعني الطن اللي هو الف كيلو على دفعات بعدها اقوم بأرسالها الى الرياض وجده


كيف تنسق مع المهربين في وصول الحشيش مع الجبال ؟

اولآ اتصل مع المورد في اليمن و احدد الكميه المطلوبه و نحدد يوم معين و يقوم بجلب حمالين متخصصين ويكون قيمة تحميل الكيلو خمسمائة ريال .


كيف طريقة النزول مع الجبل و الاستقبال ؟

فيه واحد من طرف المورد يرافق الحمالين و يكون معه شريحتين وحده يمنيه ووحده سعوديه وأكون على اتصال معه على الشريحه اليمنيه لما دخل الاراضي السعوديه يستخدم الشريحه السعوديه طبعآ بينا نقطه معينه نلتقي فيها قبل و صولهم بساعه أكون موجود فيها اراقب المكان اول ما يوصلون ينزلون البضاعه في اقل من ثلاث دقايق الحمالين يرجعون ومرافقهم يركب معي عشان أحاسبه قيمة البضاعه ثاني يوم أوصله الترحيل او الجبل عشان يرجع .



طيب وين حرس الحدود ؟

شوف فيه شي نسميه تدبير نتفق مع افراد دورية حرس حدود مقابل مبلغ مالي على انهم يحددون لنا مكان معين في وقت معين عشان يمرون الحمالين ‏.


طيب تستقبل البضاعه لحالك و لا معك ناس ؟

شوف انا بكشف لك طريقه حنا نسويها طبعآ فيها تجنيد صغار السن .
أشوف لي ثلاثه من صغار السن و لي نظرتي فيهم ابدأ اعطيهم مخدرات لروسهم و جلساتهم معي و روحاتهم معي وفي يوم وهم معي أفتعل مشكله مع دوريه أو فرقت مخدرات و أقوم بأطلاق النار و الهروب وأبلغ الشباب اللي معي أنه خلاص صرنا مطلوبين برغم السياره اللي كنا فيها تكون غير صريحه يعني مسروقه من الرياض او اي منطقه واللوحات غير طبعآ الشباب ما يعرفون الكلام هذا واسوي فلم هندي نخبي السياره وأوفر لهم سكن وابلغهم أن فيه مخبر اعطى اسامينا للجهه اللي سوينا المشكله معها كذا أظمن جلستهم معي اربع و عشرين ساعه و خلاص صاروا مطلوبين .
يروحون معي نستقبل بضاعه من المهربين عشان ادربهم بعدها اذا فيه بضاعه جايه هم يستقبلون اقول لهم انا مشغول و انتم روحوا أستقبلوا وانا معكم على الجوال طبعآ المهربين على أتصال معي وانا مع الشباب واراقبهم من بعيد ولما يحملوا البضاعه أكون انا وراهم في سياره هم ما يعرفوها عشان اظمن اي تلاعب .
ممكن أنت تكلمني جايك بضاعه بس ما عندك من يستقبل أتفق معك استقبلها وأخذ على الكيلو خمسمائة ريال و أستغل الشباب هذولا طبعآ هم لهم مني أني أوفر لهم السكن و السياره و الكيف واذا احتاجوا فلوس .


منين تستقبل المهربين ؟

مع سقام أو اللجم أو زور وادعه


لو مسكت الحمله ؟

لو مسكت يتحملها المورد لا تنسى المرافق اللي يجي مع البضاعه عشان يظمن أن مافيه تلاعب .


طيب لما تجيك البضاعه ايش تسوي فيها ؟

فيه للتوزيع داخل نجران و تكون محجوزه قبل وصولها و نعطيها للي حاجزها .
الباقي نسوي له تخزين في اماكن خاصه يعني حفره في مزرعه ندفنه فيها او احطه عند واحد من الشباب مقابل حاجه معقوله فلوس او زقاره
وهذي الكميه لما تجيني حبوب ما اعطيهم فلوس اعطيهم حشيش يعني مقايضه .
وفيه زباين في الرياض او جده اوصلها لهم عن طريق ناس متخصصين ينقلونها مع عوايلهم و ياخذون على الكيلوا من خمسمائه الى الف ريال .
طبعآ أعطيهم رقم جوال في المنطقه اللي الحمله متجهه لها يوصلون هناك يعطونه البضاعه ولا لهم دخل في الحساب أنا اتحاسب معهم بطريقتي ارسل لهم أحد يستلم الفلوس أو عن طريق البنك .

ايش الوسائل المستخدمه في الترويج ؟

اولآ عندك الموزع يعطي رقمه للي يشتري منه و يقول له اذا حد يبغا عطه رقمي و يقولي انه من طرفك و كذا ينعرف و الجوال خادمنا خدمه كبيره .


فيه مواسم نشطه للترويج ؟

عندك ايام الرواتب افضل ايام الترويج .
والأجازات و الأعياد .
على العموم السنه كلها موسم .


كم دخلك اليومي ؟

من الترويج داخل المنطقه من ثمانين الف الى مائة الف في ايام الرواتب والايام العاديه من الثلاثين الف الى الخمسين الف .
طبعآ هذا غير الصفقات


طيب تودع المبالغ في البنك ؟

مستحيل بس نشتري اراضي نشارك في معارض السيارات .
شوف معارض السيارات اكبر مكان نغطي حالة الثراء من المخدرات وفي نفس الوقت فيه اصحاب معارض شغالين معنا والسيارات مجرد تغطيه .
ولا تنسى المزارع نشتري فيها والعماير .


طيب فيه نسوان يشترون منكم او يروجون ؟

فيه خارج نجران ناخذ حبوب من عند نسوان في وادي بن هشبل و نبيع حشيش عليهم و على نسوان في ابها .


بس اسمع أن فيه مخدرات منتشره في مدارس البنات و الكليه في نجران ؟

فيه بس هذي لها قصه اسمعني .
فيه مدرسات من خارج المنطقه يتعاطون المخدرات و يسوون علاقات مع الشباب و يجيني شاب انا عارف انه ما يتعاطى المخدرات يشتري شد شدين حبوب نص كيلو حشيش واسأله غريبه ايش تبغا بها يقول والله ما هي بلي هذي صديقتي طالبتني مخدرات وانا اوفره لها عشان ما اخسرها .
طبعآ هي معاها اكثر من صديق و تبدا تروج في مدرستها او كليتها وتحط لها بنت او بنتين يوزعون لها داخل المدرسه .


أنا اسمع أنكم تستغلون صغار السن جنسيآ مقابل مخدرات ؟

اسمعني احيان يجيك واحد صغير سن يبغا مخدرات بس ما عنده فلوس يضطر انه يعرض نفسه عليك وفيه صغار سن يجلسون جلسات تعاطي مع ناس اكبر منه سن و يستغلونه اثناء هذي الجلسات .
وفيه ناس يجيك عشان يكسبك لأنك مروج يعزمك في بيته و يخلي اهل بيته يطلعون عليك و يفتح مجال لك على هله .


من ناحية الضغط المادي على المستخدمين عطني فكره عن ذي النقطه ؟

شوف عندك اللي يتعاطون الحبوب اكثر ناس ينهارون ماديآ بعضهم يجيك برشاشه و حد بجنبيته و حد يرهن استمارته و حد يعطيك سيارته قطع تصدق أنها توصل انه يجيك بأصطوانة الغاز و الفرن و حد بغنم و بعضهم يسرق عشان يحصل على مخدرات .
من ظمن المواقف واحد جايب ذهب هله.
بعضهم يبكي بين يدك و يحب راسك و يدك و يخلس ثوبه عندك في ثلاث حبات .


ما يدخل قلبك رحمه ؟

شوف بالعكس انا احتقرهم بعدين انا راعي مصلحه طز فيهم وفي ابوهم اللي ماهو بكفو لشي لا يقربه .


ايش تستفيد من الترويج ؟

استفيد لنفسي ماديآ


ما تشوف انك تدمر الشباب ؟

انا ما خبطت حد على يده بعدين افرض اني ما اروج يعني ما راح يكون فيه غيري يروج هذي مشكله خاصه بكل شخص لا تحملني المسؤليه حمل اللي يتعاطون مسؤلية انفسهم .


أنت اعطيتني معلومات كثير انا بأوصلها للدوله وأبلغ فيك ؟

هاهاهاها بلغ ما عندي مشكله .


ليه ما تخاف ؟

شوف الاداره اللي بتبلغ فيها بيجيني الخبر من نفس الاداره عن طريق مصادري


طيب و يش بتسوي معي ؟

بأحط لك مسمار


يعني ايش مسمار ؟

شوف لك اخوان اول شي احرق كبدك في واحد منهم لي أعوان بأحط لأخيك في سيارته مخدرات .
بأسوي لك قضيه من غير ما أطلع في الصوره لو بعد سنين . انا أحذرك ولا تقول بأبلغ الدوله عن كلامك و أنك هددتني والله ما ينفعونك انتبه لأسرتك .


كلمه اخيره لمن توجها ؟


للناس ربوا عيالكم تسلمون من الشر 0