أعظم قصيدة في التوجد على مستوى الشعر النبطي

بسم الله الرحمن الرحيم

هذي القصيده للشاعر/خالد بن مدعث الدوسري..





وقد اجمع الكثير من كبار الشعراء انها من اعظم قصائد التوجّد في الشعر النبطي بماتحمله من قوه معنى والقافيه وحدة الكلمات وتأثير العبارات..


فلكم الحكم بعد قرائتهاها والتمعن بكلماتها المؤثره وقد جارا هذه القصيدة اكثر من 25 شاعر



كل ما فاضت عيوني باشت الأضلاع غنـا
الموارد في الضلوع وكل ضلع فـي ونـه


والتمني ما يحقق هقوت القلـب ان تمنـا
بس قلبي ما يداني تبعـد الهقـوات منـه


وا وجودي وجد من جلي عن دياره مجنـا
تو عمره عشر واربع والليالي مـا تحنـه


ما وراه إلا عجوزٍ واختـه وعـود مسنـا
بين فقر وبين دين وبين ضيم وبيـن منـه


ما ذبحهم غير دمع من الغبينه مـا يكنـا
ويل من سود الليالـي بالمصايـب يبتلنـه


راح مثل الذيب وهبلته حياة الذيـب ظنـا
وآمن والموت يومه بين مخلابـه وسنـه


راح ينقل دم قلبه وان ضواه الليـل ونـا
الذيابـه مروحاتـه والسيـوف يدورونـه


ليا ذكر دم القرايب عانـق البيـدا وثنـا
وان تذكر ضحكة امه زاغ قلبه من مغنـه


ما يلوعه في حشاه إلا ليا شاف البرق سنا
غاب عشر اسنين ما به من يرد العلم عنه


ان حداه الخوف منا هزت الأشـواق منـا
يوم طال الوقت عود للديـار اللـي ربنـه


قـال مـا دام المذلـه والبـلاوي يبتلنـا
والله ان الموت في الأوطان بين الربع جنه


يوم وقف في المنازل ما لقى بيـت مبنـا
غير بيـت للهبايـب والـذواري يلعبنـه


راح يمه كنه اللي ضاربـه رمـح مطنـا
وعذابه ما دري ان اسهوم بقعـا يحترنـه


يوم قرب سمع له صوت من العلـه يحنـا
حصل امه عندها ضيف يقول الموت سنـة


قال يمه قالت عيوني مـن الدمـع انعمنـا
قال ابويه قالت اطوال النصايب قد خذنـه


قال واختي قالت اقفى القوم باختك مع ظعنا
قال ربعي قالت اسنيـن المجاعـة فرقنـه


قال جيتك قالت ان الموت ما ظنـي تونـا
واستلمها نازع الارواح روحـن مرجهنـه


ثم صاح من التفرق صيحة اللي فيه جنـا
دق صدره وانطوى من حر ما به طي شنه


كل هذا حال قلـب مـن خلقـه الله معنـا
الهمـوم يوكلنـه والـروابـع يوكلـنـه


ليه ادور للسبايب والسبـب فينـا ومنـا
النفوس وما تسوي واليدين ومـا حصدنـا


لا تسودنا الخطايا نلحـق الشرهـه زمنـا
ما جزانـا إلا عملنـا والخلائـق يثبتنـه