أبا القوايل

اترككم مع هذه الصور الابداعية التي لايجيدها الا ابالقوايل صاحب التجارب العاطفية والعلاقات المخملية

ابا القوايل صاح باعلـى المقاصيـر=واحظي اللي ينعثـر كـل مـا ثـار
كبدي يشلخهـا رهـاف السواطيـر=ياكن يشذب ثومـة القلـب منشـار
من اوّلن عندي ضيـوف ومساييـر=واليوم ِيفزع بالعشـا لـي والافطـار
لاواحريمي كيـف راحـن مخاسيـر=عقب الكرم ردَّت على مـدَّت الجـار
طارن من ايديني سـواة العصافيـر=يابو دحيـم الاولـه طـارت طيـار
ويابو دحيـم الثانيـه مابهـا خيـر=عِجزت اعايرها علـى كـل معيـار
والثالثه عِلمـه يجـي لـك بتفسيـ=يابو دحيم اقـول لـك كـل ماصـار
اخذت لي غندورتن من هـل الديـر=سوريتـن حوريتـن تقـل ديـنـار
من هيفن اطوالـن اتلاعـن مغاتيـر=مالاحهـا حـرن ولا شافـت غبـار
اذريِّعـاتـه كنـهـن الجمـامـيـر=وراسن طويل معدّين خمسة اشبـار
عيونن دواويـرن إنهـودن مزابيـر=خدودن نواويرن بهن حمـرة النـار
نقيتهـا مـن بيـن كـل الغنـاديـر=كما ينقـي الطيـر للقنـص صقـار
ودفعـت ماهمـن كثيـر الدنانـيـر=ونَدّرتهـا تنقـاة خبـري وبيـطـار
وشلته على الددسن وجينـا محاديـر=نمشي نهـار ولظْلـم الليـل نحتـار
مابه قزازن والبـلا مابهـا اسبيـر=وإيلا مشت عشرين يطفـن الانـوار
والكلبليتـر مابقـا بـه مسامـيـر=والا الاديتـر باقيـن فيـه مسمـار
وكنداستـه وطيتـه مـن التياسيـر=طاحت بالاردن قبـل ناصـل لعمـار
وان جت مع البطناج يطلع عصا القير=وبطناجها دايـم مـع البـر والقـار
وإيلا ركبت الزفت كني علـى عيـر=وإيلا طرقت البر كني علـى حمـار
مع البـراري راح نـص المشاويـر=نبعد عـن الـرادار ماندخـل ديـار
نجهـم صبـاح وبالليالـي مخاميـر=نمشـي خفـا ماشافـنـا ولا رادار
نبعد عن التفتيـش ونتابـع السيـر=من دارهم تسعة عشـر يـوم للـدار
وقعدت انا والبنـت عاميـن ماغيـر=بس انتلاحـق كننـا البـس والفـار
ولا شفت من بنت الاجاويد تقصيـر=ولا اشتكت لي ماتعاني مـن مـرار
بالبيـت تدبيـرن ولا فيـه تبـذيـر=ولا يفوتـه مـن كبيـرات وصغـار
لبس نظيف وريحـة البيـت تبخيـر=إيلا دَخلْـت اريـاح دكـان عطـار
وجاب الله وليدن لنـا تقـل قصديـر=ابيض تشوفه لـو يطفَّـن الانـوار
يذرف بياضن مثل صبـغ الطباشيـر=وإلا لقاحن لـه اسبوعيـن بصـرار
وقالـوا اهلهـا هاتهـا دون تأخيـر=نبي نشوف وليدنـا نسـل الاحـرار
ورحنا جميع نبشـر اهلـه تباشيـر=ياناقلن حتفـه علـى كتفـه امـرار
قالوا لي والله ماتشيلـه لـو تطيـر=إلا تحقـق مانبـي منـك واخـتـار
وصكوا عليّه يـوم جونـي طوابيـر=وداروا علـي بحلقتـن دار مــادار
امـه تبـي مطعـم وبنتـه كوافيـر=واخوانهـا يبغـون دكـان جــزار
وخاله يبي لـه موتـرن ٍللمشاويـر=وعمه يبي ددسن او وايـت وحفـار
يقول انا اول من حفـر بالبلـد بيـر=بالنصف انا وياك في حفـر الآبـار
وعشرين فيـزه للابـو والمشاهيـر=ومع كل فيـزه فزعتـن الـف دولار
واللي يبـي فيـزة مصلـح دوافيـر=واللي يبـي فيـزة مليـس ونجـار
امورهم تمشي علـى دهنـة السيـر=وان ما دهنت السير فالسير ماسـار
بديارهـم ضاعـت علـى التدابيـر=صقرن بنجد وعندهم صرت مطيـار
آقف واطيح بوسطهم تقل بـي طيـر=مراجلي ضاعـت وضاعـن الافكـار
ضـاع الشمـاغ وقِطعَـن الازاريـر=كلِّـن يتلـن مابِِقـىَ بـي ولا زرار
عشري غدن دمن الارانـب مداهيـر=ومنوّلن عشري يجن دمنـة حـوار
يقـول الاول مامـع الفقـر تدبيـر=وانا ان دفعت شروطهم صرت طرار
وجيتـك وخليتـه ودمعـي شخاتيـر=هي والولد غصبن ولا نيـب مختـار
ويالله ترضينـا بقـسـم المقـاديـر=وتلطف بنا لاجـت مقاسيـم الاقـدار
وتفرج لقلبن صار يكفخ كما الطيـر=ولولا ضلوعي كـان لديارهـم طـار