لاتكثر المدح في إللي مايحب الجميل

خميس يالبسي الضافي وسيفي الصقيل
أقبل وصاتي وخذ منها الكلام المليح

لاتكثر المدح في إللي مايحب الجميل
دور لمدحك رجالاً تستحق المديح

ياكم مدحنا من العالم وحجمه قليل
لكن قال ألمثل ماصح غير الصحيح

واحذر تماشي قليل الرشد وإلا البخيل
خلك بحالك وخل اهل الردى تستريح

خلك مع أهل الوفاء صادق وحذرى تميل
لاتكثر الهرج في المجلس وخلك صريح

والناس لاتسمع اسرارك وهرجاً هزيل
وإللي هرج معك بكره بالسراير يُبيح

وإحذر من أهل النمايم والضعيف الذليل
لاتستمع في سوالفهم وتصبح طريح

وابعد عن إللي علومه بين حطاً وشيل
ولاتسمع إللي بهرجه في المجالس قبيح

وإحذر وانا ابوك ذولا ماوراهم حصيل
وجنب عن أللاش وبخيلاً يمينه شحيح

ساير رجال الكرم والدين واخذ الخليل
وساير إللي على المنهاج علمه صحيح

والضيف إذا حل دارك صبح وإن كان ليل
قابل ورحّب وخل الصدر مجلس فسيح

قدم له الهيل والواجب وتمر النخيل
وأعطه من الهرج معسوله وخلك فصيح

وإذا طلب منك فزعه لاتقل مستحيل
أخبرك وافي ومن روساً تقاوي النطيح

وعن الكرم والجمايل لاتدور بديل
واحذر وانا ابوك لايسمع كلاماً(ن)جريح

واوصيك واوصيك وانا أبوك خلك ثقيل
ومالك ومال ألذي يكثر عليك النبيح

وإن جاء الخطاء من قريب الناس شُدّ الرحيل
وإصبر على غلطة الصاحِب وخلك سميح

وإذا أصبح أهل الوشايه بين قولاً وقيل
الباب قفل لحاجه لايجي منه ريح

واحرص ولاتاخذ الكلمه بليا دليل
ياجعل حظك مع اهل المعرفه مايطيح

إسمع بيوت الشعِرياجعل عمرك طويل
من شاعراً هاجسه بالقاف يقدح قديح

كلمات/ابوخالد