ياصغير السن

ياصغيّر السن قدرك طاحـت أبراجـه

الجرح خلّى الصخـر ينطـق ونطقّنـي

خلاص ماعاد تعنـي لـي ولا حاجـة

رح.. جعـل ربـي يوفقـك ويوفقنـي

من بعد ماكنت نور العمـر وسراجـه

اليوم صـرت الظـلام اللـي يطوقنـي

عطيتك أكثر من اللـي كنـت تحتاجـه

أسرفت ف( الحب) ..لين الحب وهقني

خلاص.. مالي ومال الحـب وإزعاجـه

مالي ومال الـدروب اللـي تضايقنـي

تعبت أضـمّ البحـر وأهـدِّي أمواجـه

تعبت أجامل و أشوف الوقت يسرقنـي

شكواي للي عليه الضيـق و إفراجـه

اللي إذا شـاء.. يرحمنـي ويرزقنـي

أما أنت يابـو جبيـنٍ عقّّـد حجاجـه

لاعاد تسأل: "علامك ما أنت طايقني ؟"

النـاس كـلٍ علـى دربـه ومنهاجـه

وأنا عن الناس مابـه شـي يفرقنـي

إلا أني دايم أحـب الصـدق وأواجـه

مخلوق .. و الله على هالوضع خالقني

حتى رفيقي ضمـاد الجـرح وعلاجـه

على كثر ما أتمّسك فيه .. صدقّنـي ..

لو أدري إنه مرافقنـي علـى حاجـه

لأمسّكه حاجتـه.. وأقـول : فارقنـي

الشاعر فهد المساعد