انتي اجمل من صباح السالفه ..

اخترت لكم هذه القصيده على ذوقي
اتمنى أن تنال اعجابكم وترتقي لذوائقكم ..



أنتي أجمل من صباح السالفه وارض الكلام
أنتي أغلى من بياض القلب وأنتي بسمته

يا هلا بك من هنا لين أولك لين الختام
يا ورود ٍ علمت قلبي يضج بهمسته

إن نثرتك في يدين الحلم .. ناداني المنام
وان زهمتك ينتثر قلبي على أول غلطته

يا مشاعر غيرت تاريخ عشقي والغرام
يا رياح ٍ تشرح لدربي معاني عثرته

لا النظر كان العيون ولا الزعل وجه الخصام
ولا الحكي دفتر سنين ٍ مات داخل كلمته

لا اضطراباتي حقيقه ..لا ارتعاشي وسام
كانه اخفق هـ الخفوق ولا ارتقت لكنبضته

لا بداياتي قصيد .. ولا النهايات انهزام
ولا الحكي ورد ٍ تلعثم في شفاتك رقته

انتبهاتي لطرفك .. وانفعالاتي سلام
وارتياحي في وجودك .. طفل حقق رغبته

كل ما اجلس بين سمعك والنظر .. طار الحمام
يرسم اللي حس فيني .. ليتك اللي حسته

الله اعلم كيف اسوي كان رتبتي الوئام
وانتهى من العمر عمر ٍ متعبتني قصته

كيف ابوصف لك هواك وكيف اغرد بانسجام
وكيف اقول اني جعلت الليل يرثي ظلمته

كيف امازح هـ الطريق اللي عطا قدري .. خطام
وكيف اقول لبعد بكره : ليلة البارح جته

والله انه لو صفا وجه الزمن والحظ قام
لاترك المجنون يعبث لين تعقل دنيته

فهميني ياوهج صدري .. ترى الغيت النظام
من حياتي ياحياتي .. وانتي اللي هزته

كبـّلي طول المسافه واكسري خشم الحرام
واقهري ليل الثلوج اللي صفت لي وحدته

لك حروفي .. لك ذنوبي .. لك غرور الانتقام
لك بداياتي وجهلي .. لك نهاية خطوته

لوتلوّن واقعي بالحلم وانكف الصدام
لوّحي باصدق حلوفي .. واحلف انك سبـّته

ماعلى ادراج الرياح ان لمـّت احزاني ملام
ولا على حزني ملام ان كان ماتت ثورته

اقتحمت الشعر لجلك واكبر الظلم اقتحام
لكن الله راد حرفي يعجبك في رعشته

لو تواريخي سوالف كان اسولف للأنام
عن زهر عشق ٍ لمستي قبل مده شوكته

كنت احارب قلبي اللي حب وافرط فـ الهيام
كنت مابي تعرفين اني وقعت بلعنته

كنت اغالط .. كنت اكابر .. كنت اقول اني تمام
وان احاسيسي مجرد قلب مارس نزوته

وامتلا صدري بشوق ٍ مل من كثر الزحام
ماحصل قد جبت له طاري وطالت مدته

ويوم شفت ان المطر يزداد لا زاد الغمام
قلت اصرّح .. وابتدا الرسام يرسم لوحته

ان تخالط نبضنا صارت لك عيوني مقام
لين تاقف نبضة العاشق وينهي رحلته

وان تغليتي علي ّ ولا اعجبتك ارض الكلام
ويش عذرك من بياض القلب وانتي بسمته



مع ودي وتقديري
الحريصي